Í áfanganum verða lesnar íslenskar og erlendar glæpasögur. Fjallað verður um sögu glæpasagnaritunar, stöðu glæpasögunnar innan bókmenntanna og glæpasöguformið skoðað. Þróun glæpasagna í gegnum tíðina verður könnuð út frá samfélagslegum áhrifum. Nemendur lesa glæpasögur og horfa á þætti og kvikmyndir sem tengjast völdum sögum. Þá verður reynt að svara spurningunni „af hverju erum við svona heilluð af glæpum?“
5 einingar í íslensku á 3. þrepi.
Nemandi skal hafa öðlast þekkingu og skilning á:
helstu einkennum bókmenntategundarinnar
stöðu glæpasagna innan bókmennta
sögu og þróun glæpasagnaritunar erlendis og á Íslandi
tengslum bókmenntagreinarinnar við aðra miðla, svo sem kvikmyndir og sjónvarp
fjölbreyttum verkum innan greinarinnar eftir íslenska og erlenda höfunda
Nemandi skal hafa öðlast leikni í að:
beita hugtökum bókmenntafræðinnar þegar fjallað er um glæpasögur
lesa og fjalla um glæpasögur á fræðilegan hátt
taka þátt í umræðum um bókmenntagreinina á málefnalegan og gagnrýninn hátt
Nemandi skal geta hagnýtt þá almennu þekkingu og leikni sem hann hefur aflað sér til að:
átta sig á tengslum samfélagslegrar þróunar og glæpasagna
taka afstöðu og tjá sig um bókmenntir á málefnalegan hátt
koma skoðunum sínum á framfæri með skýrum hætti og í vönduðu máli bæði í ræðu og riti
Námsmat áfangans byggir á fjölbreyttri og skapandi verkefnavinnu ásamt þátttöku í kennslustundum.