Lotubundin föll, hornafallareglur, hornaföll, jöfnur lína og hringa, vigrar
Samþykkt af skóla
3
5
FB
Í áfanganum er farið í hornafræði þríhyrnings, tengsl algebru og rúmfræði og jöfnu línu og hrings. Nemendur eiga að kunna skil á hornaföllum og tengslum þeirra við einingarhringinn. Þekkja lotu hornafalla og geta teiknað ferla sínus-, kósínus- og tangensfalla og hliðrað ferlum. Nemendur læra skilgreiningar og reiknireglur fyrir vigra.
STÆR2MM05
Nemandi skal hafa öðlast þekkingu og skilning á:
lotubundnum föllum og hornaföllum
sönnunum á helstu reglum í námsefninu
jöfnu hrings, almennri jöfnu og stikun
ofanvarpi punkts og línu á vigur
hornafræði þríhyrninga, stefnuhorni línu, sínusreglu, kósínusreglu og flatarmálsreglu
almennri skilgreiningu hornafalla
bogamáli og umritunarreglum hornafalla
nákvæmum gildum hornafalla og tengingu við einingarhring
vigurreikningi í sléttum fleti, summu, mismun, lengd og innfeldi vigra, horni milli vigra, samsíða og hornréttum vigrum
Nemandi skal hafa öðlast leikni í að:
takast á við margbreytileg viðfangsefni stærðfræðinnar og horfa á viðfangsefni út frá ólíkum sjónarhornum
tengja eldri þekkingu við nýja þekkingu
segja „sögu“ verkefnis frá upphafi til enda
beita táknmáli stærðfræðinnar
tjá sig um niðurstöður á skilmerkilegu máli
færa sönnur á stærðfræðireglur tengdar vigrum og hornaföllum
reikna með vigrum
meðhöndla hornaföll og hornafallareglur
meðhöndla lotubundin föll og gröf þeirra
Nemandi skal geta hagnýtt þá almennu þekkingu og leikni sem hann hefur aflað sér til að:
rökstyðja aðferðir og hugsanaferli með skýrum hætti
beita voldugu táknmáli stærðfræðinnar sem er mjög mikilvæg viðbót við hið venjulega tungumál og gerir það að öflugu tjáningartæki
temja sér góða framsetningu og skipulögð vinnubrögð
lesa, skrifa og tjá sig í töluðu máli um efnisatriði sem tengjast stærðfræði með beinum eða óbeinum hætti
átta sig á viðfangsefnum verkefna og þeim skilyrðum sem sett eru fram
einfalda verkefni sem við fyrstu sýn virðast flókin
orða hlutina með öðrum og e.t.v. skiljanlegri hætti
átta sig á lykilatriðum og greina hismið frá kjarnanum
Lögð er áhersla á að hafa námsmat sem fjölbreyttast og útfært þannig að það nái til sem flestra námsþátta. Það næst með því að leggja reglulega fyrir skriflegar æfingar ásamt því að nemendur skili verkefnum (einir eða í hóp). Námsmatið tekur mið af þekkingar-, leikni- og hæfniviðmiðum áfangans . Nánari útlistun á námsmati kemur fram í kennsluáætlun.