Í þessum byrjunaráfanga er lögð áhersla á að nemendur kynnist náttúruvísindum á fjölbreyttan hátt. Í áfanganum er lögð áhersla á líffræði (vistfræði), efnafræði, umhverfisvísindi og jarðfræði. Í áfanganum er kynnt sú aðferðarfræði sem er sameiginleg náttúru- og raunvísindum. Eftirfarandi efnisþættir verða kynntir:
Eðli vísinda:
helstu skref vísindalegra aðferða, SI-einingakerfið, mælinákvæmni og markverðir stafir.
Vistfræði:
flokkun lífvera, lífverur í vistkerfi, hringrás kolefnis, framvinda vistkerfa og lífverur á Íslandi.
Efnafræði:
atómið og frumefni, lotukerfið, efnatengi og efnahvörf.
Jarðfræði:
notkun jarðfræðikorta og jarðfræði Íslands.
Umhverfisvísindi:
orsakir loftslagsbreytinga og afleiðingar þeirra á Íslandi.
Lögð er áhersla á að nemendur tengi þá þekkingu sem þeir öðlast í efnafræði, líffræði og jarðfræði við náttúru Íslands, umhverfi sitt og daglegt líf.
Nemandi skal hafa öðlast þekkingu og skilning á:
rannsóknaraðferðum í náttúru- og raunvísindum
helstu ferlum vistkerfa
uppbyggingu atóms
uppbyggingu lotukerfisins
muninum á staðfræðikortum og þemakortum
grundvallaratriðum í jarðfræði Íslands
Nemandi skal hafa öðlast leikni í að:
framkvæma verklegar æfingar og vinna úr þeim
skrifa skýrslur í tengslum við verklegar æfingar
búa til myndrit, m.a. línurit, og nota myndritin til að draga ályktanir
teikna upp fæðuvef og skilgreina flutning orku og efnis innan fæðuvefsins
lesa efnajöfnur og stilla þær
aðgreina efni í frumefni, efnasambönd og efnablöndur
nota lotukerfi
nýta sér hæðarlínur landakorta til að átta sig á hæðarmun einstakra staða á landakorti.
nýta sér jarðfræðikort til að átta sig á jarðfræði einstakra landshluta
Nemandi skal geta hagnýtt þá almennu þekkingu og leikni sem hann hefur aflað sér til að:
sýna sjálfstæði í vinnubrögðum og bera ábyrgð á eigin námsframvindu
vinna í hóp til þess að auka skilning á fyrirbærum náttúru- og raunvísinda
tengja þekkingu sína á kolefnishringrás við gróðurhúsaáhrif og loftslagsbreytingar
tengja þekkingu sína í efnafræði, líffræði og jarðvísindum við umhverfi sitt og náttúru Íslands
Námsmat er útfært í kennsluáætlun í samræmi við skólanámskrá.