Megináhersla er lögð á að nemendur tileinki sér undirstöðuatriði tungumálsins. Nemendur eru þjálfaðir í lesskilningi ásamt samskiptaþáttunum tali, frásögn, hlustun og ritun. Áhersla er lögð á framburð, uppbyggingu orðaforða og að þjálfa grunnatriði málfræðinnar. Fléttað er inn í kennsluna menningu spænskumælandi landa.
Nemandi skal hafa öðlast þekkingu og skilning á:
orðaforða til að kynna sig og aðra og lýsa nánasta umhverfi
helstu reglum um framburð tungumálsins
grunnatriðum spænskrar málfræði og málnotkunar
spænskumælandi löndum, útbreiðslu tungumálsins, samskiptavenjum og siðum mismunandi spænskumælandi þjóða
Nemandi skal hafa öðlast leikni í að:
skilja einfalt talað mál um kunnugleg efni þegar talað er skýrt
lesa og skilja einfalda texta
taka þátt í einföldum samræðum um afmarkað kunnuglegt efni
nota einföld orðasambönd og setningar til að kynna sig og segja frá fólki sem hann þekkir
skrifa stutta og einfalda texta um sjálfan sig, um fjölskyldu sína og nánasta umhverfi
beita helstu málnotkunarreglum
Nemandi skal geta hagnýtt þá almennu þekkingu og leikni sem hann hefur aflað sér til að:
taka þátt í einföldum samræðum á spænsku
lesa einfalda texta sér til gagns og gaman
greina einfaldar upplýsingar um kunnugleg efni bæði í töluðu og rituðu máli og beita kurteisis- og málvenjum við hæfi
Námsmatið endurspeglar þjálfun færniþátta í kennslu. Framfarir nemenda eru stöðugt metnar og tekið er tillit til allra færniþáttanna fjögurra: lesturs, hlustunar, tals og ritunar. Mat felst í verkefnum, munnlegum og skriflegum prófum.