Ferilmappa fylgir nemandanum í starfsþjálfun. Markmiðið er að ferilmappan haldi utan um og gefi yfirlit yfir starfsnámið og að nemandinn vinni í hana jafnhliða því. Í ferilmöppu koma fram þeir verkþættir sem starfsþjálfun nær til og tengsl þeirra við námsmarkmið. Þar eiga einnig heima almennar upplýsingar um vinnustaðinn og atvinnulífið, verksvið nemandans og skyldur ásamt vinnuskýrslum og gátlistum vegna verkefna og mats á starfsþjálfuninni. Fyrirtæki geta aðlagað verkefnalista í ferilmöppu að sínum þörfum en með það markmið í huga að nemandinn fái sem fjölbreyttasta reynslu og góða yfirsýn yfir starfsemi fyrirtækisins. Frammistöðumat fylgir í ferilmöppu og æskilegt er að leiðbeinandi og nemandi fari yfir matið í sameiningu í lok verkþjálfunartímabilsins. Upplýsingar sem nemendur skrá í ferilbók nýtast þeim í atvinnuumsóknum og ferilskrám.
Nemandi skal hafa öðlast þekkingu og skilning á:
skyldum sínum, verksviði og vinnuskýrslum í starfsþjálfun
starfsumhverfi skapandi greina
aðilum sem koma að atvinnulífinu, s.s. fag- og hagsmunafélögum
réttindum og skyldum á vinnumarkaði
Nemandi skal hafa öðlast leikni í að:
gera vinnuskýrslur
gera starfsumsóknir og ferilskrár
Nemandi skal geta hagnýtt þá almennu þekkingu og leikni sem hann hefur aflað sér til að:
hafa yfirsýn yfir starfsþjálfun sína
skilja verkþætti starfsins
greina styrkleika og veikleika sína sem tengjast starfsþjálfuninni
miðla upplýsingum til þeirra sem á þurfa að halda
Námsmat er útfært í kennsluáætlun í samræmi við skólanámskrá