Markmið áfangans er að nemendur geti nýtt sér ljósmyndavélina á skapandi hátt sem vinnutæki í eigin verkum. Í áfanganum læra nemendur þau tækniatriði er lúta að notkun stafrænna véla með fyrirlestrum og verkefnum. Farið er í listræna hlið ljósmyndunar og unnið með myndbyggingu, litafræði, lýsingu, formfræði og nálgun myndefnis. Verkefni miða að því að nemendur öðlist þekkingu og skilning á ljósmyndatökum við mismunandi aðstæður og birtu, úti og inni og geti nýtt sér þekkingu sína og leikni á skapandi hátt við stúdíóvinnu og huglæg verk. Í áfanganum þjálfast nemendur í myndvinnslu stafrænna mynda í tölvum. Áhersla er lögð á að þroska nemendur í inntaki og uppbyggingu mynda og að þeir skoði og skilgreini sín eigin verk, annarra nemenda og valin verk úr ljósmyndasögunni, séu læsir á umhverfi sitt og læri að skoða það á nýjan hátt í gegnum linsuna.
Nemandi skal hafa öðlast þekkingu og skilning á:
uppbyggingu, aðferðum og hugtökum ljósmyndunar
eigin styrkleika til að nýta sér í margs konar hugmyndasmíði og sköpun
stafrænum ljósmyndavélum og myndvinnsluforritum
Nemandi skal hafa öðlast leikni í að:
nota stafrænar ljósmyndavélar við listsköpun sína við hinar ýmsu aðstæður
beita myndvinnsluforritum við tölvuvinnslu ljósmynda og geti valið viðeigandi leið með tilliti til verksins
vinna með margbreytilegar leiðir í ljósmyndun
Nemandi skal geta hagnýtt þá almennu þekkingu og leikni sem hann hefur aflað sér til að:
sýna frumkvæði og skapandi nálgun í verkum sínum
tjá sig á skýran, ábyrgan og gagnrýninn hátt um eigin verk og annarra af þekkingu, víðsýni og umburðarlyndi
Námsmat er útfært í kennsluáætlun í samræmi við skólanámskrá